လှည့်ကွက်

လှည့်ကွက် Dec 28, 2013 

(စကားတွေ သိတ်ကြမ်းတာပဲလို့ ခဏခဏခေါ်ယူဆုံးမခံနေရလို့ လေပေါင်လျော့ပြီးပြောမယ်။ သေချာတာကတော့ အပြစ်ရှိရင် နာသည်ထက်နာအောင်ပြောချင်တယ်။

ဒီနေ့နိုင်ငံရေးမှာ ပြဿနာဖြစ်လာရင် လှည့်ကွက်လှည့်ကွက်နဲ့ အတော်ပြောတယ်။ ပြောတဲ့သူတော်တော်များများကလည်း နိုင်ငံရေးအပါးဝတဲ့ပုံစံမျိုး ဂိုက်ပေးကလည်းကြမ်းပ။ ကဲ လှည့်ကွက်ပဲထားပါတော့ ပြည်သူမပါဝင်ဘဲ ပြည်သူတွေမတို့မထိဘဲ ပြီးနိုင်တဲ့ကိစ္စများရှိသလားဗျာ။ ကျုပ်ကတော့ နိုင်ငံရေးသမားတွေမကြိုက်ဘူး။ လူမှုရေးသမားတွေဘဲကြိုက်တယ်။ လူမှု့ရေးသမားတွေက သူတို့ကိုယ်တိုင်စွန့်လွတ်အနစ်နာခံပြီး ပြည်သူကိုအလုပ်အကျွေးပြုတယ်။ အသိဉာဏ်ကင်းမဲ့သူတွေဆိုပြီး ဘယ်နံရောအခါကမှ ပြည်သူကို မစွန့်ပစ်ခဲ့ဘူး။ နိုင်ငံရေးသမားတွေကတော့ မလိုတစ်မျိုး လိုတစ်မျိုး။ သေစရာရှိရင် ပြည်သူကိုရှေ့ကထားပြီး ခါးစည်းခံခိုင်းတယ်။ ဂုဏ်ရောင်ထွန်းပြောင်တော့ ကားပေါ်ကလက်ကလေးဝေ့ရမ်းပြသွားတာပါပဲ။ သူတို့မရှင်းနိုင်တော့ဘူး စိတ်ရှုပ်ထွေးလာရင်တော့ နိုင်ငံရေးလှည့်ကွက်တွေပါပြောပြီးတော့ ဘာမှမလုပ်ဘဲ နောက်ဆုတ်ပြီးချောင်ပိတ်ထိုင်တော့တာပဲ။ ပြည်သူကို စွန့်ပစ်ထွက်ပြေးလေ့ရှိတယ်။

ဟော ဒီနေ့မှာ လှည့်ကွက်ဆိုတာတွေကြားရပြန်ပြီ။ ပြည်သူကိုစွန့်ပစ်ထွက်ပြေးပါဦးမယ်။ ကြည့်နေလိုက်ပါ။ ရာဇဝင်များရဲ့သတို့သမီးကလေး ဧရာဝတီမြစ်ဆုံပေါ့ဗျာ။ ပြည်သူတွေက ကန့်ကွက်ဆန္ဒပြမယ့်အရေး ခြေဥပြင်ဆိုတဲ့ အခြေခံဥပဒေပြင်ဆင်ရေးကို အာရုံမစိုက်အောင်လှည့်ကွက်လုပ်ပါသတဲ့ဗျာ။ ဒါတော့ တဆိတ်လွန်ပြီထင်ပ။ ဘာသေဘာလဲ လှည့်ကွက်ဆိုတော့ ပြည်သူကဘာမှမလုပ်ပဲ ငုံ့ခံရမှာလား။ ကျုပ်တို့လည်းအခြေခံဥပဒေပြင်ချင်တဲ့ပြည်သူတွေပါ။ ဘေးကိုတွန်းမထုတ်ပါနဲ့။ အရေးကြီးတာ အရင်လုပ်ဆိုသလို ဒီနေ့ပြဿနာကို အရင်အာရုံစိုက်ပါ။ လှည့်ကွက်မှာမြောနေတာ ပြည်သူမဟုတ်ဘူးနော်။ အတိုက်အခံတွေ။ သွေးအခွဲခံနေရတာ ပြည်သူတွေမဟုတ်ဘူးနော် တေခတ္တခါက နံမည်ကြီးအတိုက်အခံတွေ။ သွေးခွဲနေတာ စစ်အစိုးရမဟုတ်ဘဲ အတိုက်အခံတွေကိုယ်တိုင်ပဲလုပ်နေပါတယ်။

ခင်ဗျားတို့အတိုက်အခံတွေ လှည့်ကွက်မှာမြောနေကြောင်း ဘေးထိုင်ဘုပြော ပြည်သူ့အကျိုးကို ပျက်စီးရာပျက်စီးကြောင်းလုပ်နေသူတွေ ဖြစ်ခြင်းမလှဖြစ်နေပြီ။ ဒီအချက်တွေကို ပြန်ဝေဘန်သုံးသပ်ဦး။

၁။ ပြည်သူတွေဆန္ဒပြတဲ့ကိစ္စတိုင်းမှာ ဘယ်အချက်ကိုပြေလည်အောင် လုပ်ပေးပြီးပါသလဲ။

၂။ ပြည်သူများအနေနဲ့ ဆန္ဒမပြဘဲ ပြီးပြည့်စုံသော လူနေမှုဘဝကို ရနိုင်ပါမယ်လို့ ကတိပေးနိုင်ပါပြီလား။

၃။ ပြည်သူ့အကြိုက်မလုပ်သဖြင့် ပြည်သူမပါဝင်ဘဲ ပါတီဝင်တို့ဖြင့်သာ အခြေခံဥပဒေကိုပြင်ဆင်နိုင်ပါမည်လား။

၄။ နိုင်ငံ၏ ဆယ်ရာနံှုးမျှမရှိသော သိမ်းဆည်းမြေကို ပြန်မပေးသောအစိုးရထံမှ နိုင်ငံလုံးပိုင်စိုးခွင့်အာဏာကို အခြေခံဥပဒေပြင်ဆင်ကာ အခြေခံဥပဒေပြင်ဆင်ခံကာ လွယ်လွယ်ဖြင့်ရနိုင်မည် ထင်ပါသလား။

၅။ ပြည်သူအကြိုက် ပြည်သူ့စရိုက်နှင့်ကိုက်ညီသော စည်းရုံးမှုစွမ်းရည် ခါးပြတ်နေသည်ဟု မိမိပါတီကိုသုံးသပ်မိပါသလား။

၆။ ပြည်သူတို့သည် စည်းကမ်းမဲ့သောဒီမိုကရေစီကို လျေက်လှမ်းနေသည်ဟု အခိုင်အမာယုံကြည်လျက် စည်းကမ်းပြည့်ဝသောဒီမိုကရေစီကို အတင်းအကြပ်သွတ်သွင်းလိုပါသလား။

၇။ ပြည်သူတို့သည် အမှန်တကယ်ညံ့ဖျင်းနုံနဲ့လှသော နိုင်ငံရေးအမြင်ရှိပြီး မိမိပါတီကို တိုက်ခိုက်နေပြီလို့ အမြင်ရှိနေပါသလား။

နိုင်ငံသားတိုင်း ပြည်သူတိုင်း စီးပွားရေးလုံခြုံမှုမရှိတာ ဘာသာရေးလုံခြုံမှုမရှိတာ ခံစားနေရပါတယ်။ လှည့်ကွက်လို့ပြောရုံနဲ့ ပြဿနာဟာပြီးပြေသွားတာမဟုတ်ပါဘူး။ မိမိရဲ့စွမ်းနိုင်တဲ့အား မြင့်မြတ်တဲ့ဂုဏ်ရည် နိုင်ငံတကာဝင်ဆံ့သောဝိတ်အားတို့နဲ့ ပူးပေါင်းလုပ်ကိုင်စေလိုပါတယ်။ မုန့်ဆီကြော်ကို အလယ်ကကိုက်လျှင် လျှာကျက်သွားပါလိမ့်မယ်။ မုန့်ဆီကြော်တစ်ခုလုံးကုန်အောင်စားနိုင်မှာ မဟုတ်ပါဘူး။

မိမိခွန်အားကို ချင့်ချိန်ပါ။ ခွာရာတိုင်းတိုင်းကြည့်ပါ။ နိုင်လောက်မှခွေ့ပါ။ ဒါ ဘုရားလောင်းရဲ့ နည်းနာနိဿယပါ။ အခြေခံဥပဒေပြင်ဆင်ရေးကို စွတ်အော်စွတ်မျှော်ရင် အားမနိုင်ရင် ဖင်ထိုင်လဲကျသွားမယ်။ ပြည်သူနဲ့တသားတည်းနေပြီး တစ်မြို့နယ်ချင်း တစ်မြို့ရွာချင်းစုဆောင်းအားမွေးသွားပါ။ သင်တို့ အားမတန်သေးပါလို့ သတိပေးချင်ပါတယ်။ မြေတစ်ကွက် တောင်တစ်လုံး မြစ်တစ်စင်းမျှပြည်သူတွေပြန်ရလေအောင် မတိုက်နိုင်သေးဘဲ မစွမ်းနိုင်သေးဘဲ ပြည်သူနဲ့အစေးမကပ်နိုင်သေးဘဲ အခြေခံဥပဒေကို သာယာချိုအေးစွာ ပြင်နိုင်မည်ဆိုပါက မရယ်ချင်ဘဲ ရယ်လိုက်ချင်ပါသေးသည်။ အစိုးရလှည့်ကွက်အတွင်းမှ မရုန်းထွက်နိုင်ရှာသော နိုင်ရေးသမားငသေးမွှားတို့ သတိလည်စေချင်ပါသည်။

အချိန်ပြည့် ဘုန်းတော်ဘွဲ့တွေကြားနေရချိန်မှာ ဒီအသံမျိုးက နားခါးလေမလား။ ဒါပေမယ့် တတ်နိုင်ဘူးလကွယ်။ ဆိုရေးရှိက ဆိုအပ်လှတာကိုး။ စကားကြမ်းတော့ပါမသွားလောက်ပါဘူးနော်။

နေရာတိုင်းမှာ ပညာရှင်အများအပြားရှိနေကြတဲ့အတွက် ဒီလောက်ပြောရင် အခြေခံဥပဒေပြင်ဆင်ရန် အခြေခံနည်းလမ်းကောင်းများ နည်းလမ်းများတွေ့ကြမယ် ထင်ပါတယ်ဗျာ။ ကျမ္မာရေးကြောင့် အိပ်ပါဦးမယ်။

ခင်မင်တဲ့

စေတီရှင်

LikeCommentShare

Winmin Soe and 17 others like this.

သက် သက်

ဟုတ်ပါတယ်။ပြည်သူမပါပဲ ဘာမှမပြီးနိုင်ပါဘူး။ဒါ့ကြောင့် ဒီမိုကရေစီ ခေါ်တာပေါ့။မိဘပြည်သူ မိဘပြည်သူ မိဘပြည်သူ

Like Delete Dec 28, 2013